Unn oraïj naïr
«Et cmànssae de chè !» qé je huchi. J'ta jouqaï su la murètt an dessourr la qerouézéy de l'otaé e ma merr taet yèll a-haù. Un pti evàn ol avae mein sa buéy aù hall. Deho. Maen dam vla, la piéy taet partiy a cha. Unn piéy d'aca ! I fzae chaù-mou depéi a-matein deja... Nott otaé se tnae su un tertt. Unn bàndd d'otiaù, qhoêq z-un, anmèll yèll, taen an nicachouan. E péï n-i avae unn qherouéy. Unn gràntt ! Contt le chérè q'o taet. Depéï conbein d'anêy, de siêc vantiéi q'o taet piqhéy la ? N-i avae pa aùqhun qi savae sebein. Terjou qé le saïr-la, l'istouérr maïtiae pu eincreyabb qi s'erivi parti de yèll. Vaïr... 'la ya cmànssae pa'la...
J'ta a bouae d'la goull dèrr lèz cariaù depéi unn ouréy de tàn, vantiéi pu... a ergardae lèz epârr la-lein, dvèrr Piumlè qé j'taet... i fzae brein mézae... O la piéy 'la qa tournae an net fonab... a-cou...
«Maùsion ! Gràn faï ! La qherouéy ét chètt !»
Unn eparr, unn massac d'eparr vnae de la tossae. Draé a la chupp ! O feü egrilhéy par le mitàn e cheyi com un gràn cheïnn. Petacrèï ! Tertou ouitt l'abra le saïr-la sebein. Unn faï défierémae je dehori.... La qherouéy taet draè aù-dvàn de séï nouz !... Qhae pitiae de la vaïr de meim... Dechoméy nètt ! Zagéy propp ! De tou bôrr e caùtaê, dèz morsiaù... «ma doué !» «La qherouéy ét a-ba !» Le mondd son a s'erivae béin seürr. 'la huch pa'la ! Lèz boufôm s'epiqhèll ! Lèz bonôm s'ecoqalh tàn qé pu ! E mai anmèll le fara-la ! «N-i a p'un brein de lumieinrr !», «nan n'vaï hèrm !» qé huch le mondd ! Ba dam béin seürr, n-i a pa aùqhun de vneü o unn falhi chàndèll... e la piéy qi chelhae corr. E d'aca ! Léoui le vaïzein ali n'an qri yunn unn chàndèll. A-cou j'eüm mein pou, la chàndèll, biaù qé d'yett falhitt béin falhitt, efezelhi tou-com le mondd. Chaq garantounae, tournevirae... e gaulhae com de juss e de béin antandeü sitàn qé n-i avae de l'iaù a derussae. Trànpae genae q'an taet !
Raporr a qé j'taet pti a-veü lèz aùtt j'taet pu for d'amein pour vaïr le piae aù calverr. Sti-la taet maïtiae chè, maïtiae piqhae dàn la banqhiètt, je m'crochi pour me qhutae de la piéy dessou e je velhi qé sa sèll taet craezz....
E n-i avae qhoeq chaùzz an d'dàn...
N-i avae qhoeq chaùzz an d'dàn. Dàn le fon l'fon. Je mussi ma pogn dàn le pertu. Stu-si avae la minn q'il avae taet cavae o unn om... Vennla, j'avae bitae qhoeq chaùzz... Unn bouétt... unn bouétt an boué... A la bitae je m'azivi béin q'o taet an boué... Je l'atiri doujètmàn... Vaïr, unn valh bouétt an boué... Je n'eü pa ghèrr de tàn pour la rgardae dam a caùzz qé duràn d'meim, 'la ragalae tàn qé pu antourr de mai... Le mondd taent a ergardae de tou l'z ameîn... e 'la s'ecoqalhae !... N-i avae pa qhi qi s'ta avizae de mèz fourbichrîy, maen...
Haï don ! Sàn mnae de bru, je m'an rtourni séi mai o mon qai... le saïr-la dam Memàn yèll n'eü pouein a me conae èz orâ pour qé je va a la jouq, j'amonti drè dàn ma chànb, a haù, e l'u feü croulhéy béin croulhéy.
Unn faï randeü su mon laè je parti a ergardae de la bouétt. Ett-latt avae un cagena. Mon gràn-perr, qi taet maïtiae carabo com i taet jienn, m'avae amontrae comàn m'parae dèz cagenâ de meim. O unn epilh-crochtéy q'i l'z ebigornae lu ! Je n-n'atiri yunn qi taet dàn ma préss e je la mussi dàn le terjiae. Zag ! Epréï un pti de ragalriy d'dàn, le vla béïzae le falhi cagena. J'ouvri la bouétt. O maùsion ! Dedàn n-i avae unn parchéy... unn valh parchéy... le qherr vzae digdaù dàn le berchè aù cou-la pa ! Doujetmàn béin doujetmàn je prein la parchéy, yèll-si taet arouézéléy com un rolon e n-i avae unn fritèll alantourr... o un grae nou... je le denoudi....je derouézeli la parchéy... Maùsion !..
'la qa m'fezi com unn tosséy aù qherr !